3 ay əvvəl
UFAZ müəlliminin məqaləsi Scopus və PubMed indekslərinə daxil edilmiş “Heliyon” adlı jurnalda dərc edilib
UFAZ-ın kimya müəllimi Samir Kərimovun Strasburq Universitetinin müəllimi Moris Millet və digər müəlliflərlə birgə məqaləsi “Heliyon” adlı jurnalda dərc edilib. Məqalə “1,2,4-trixlorbenzolun (TXB) bəzi üzvi həlledicilərdə radiolitik deqradasiyası: TXB-nin tam dexlorlaşmasının kinetik xüsusiyyətləri və mexanizmi” adlanır.
Bu tədqiqat AMEA-nın Radiasiya Problemləri İnstitutunun və UFAZ-ın Analitik Kimya Laboratoriyasının resurslarından istifadə etməklə həyata keçirilib. Məlumat üçün bildirək ki, “Heliyon” adlı jurnal Scopus və PubMed kimi nüfuzlu bazaların indekslərinə daxil edildiyinə görə, məqalə bütün tədqiqatçılara açıqdır.
Tədqiqatda 1,2,4-TXB heksaklorobenzen kimi davamlı üzvi çirkləndiricilərə bənzər xlorlu birləşmə kimi seçilib. 1,2,4-TXB-nin qamma radiasiyasından istifadə edərək metanol, etanol, heksan və benzen kimi müxtəlif üzvi həlledicilərdə parçalanması araşdırılıb. Tədqiqat TXB-nin üzvi sistemlərdə dexloreləşməsinin kinetik xüsusiyyətləri və yolları haqqında ətraflı məlumat verir və qamma radiolizinin TCB-ni daha sadə birləşmələrə parçalamaqda effektivliyini nümayiş etdirir. Qeyd olunan nəticələr arasında diklorobenzenlər, monoklorobenzen və son məhsul olan benzen kimi parçalanma aralıqları da yer alır.
Ətraflı məlumat üçün məqaləni bu link vasitəsilə əldə edə bilərsiniz: https://doi.org/10.1016/j.heliyon.2024.e31547.